ليه الحروف خايفه تحضنك ؟
ليه المشاعر متغربه ؟
فوق الشطوط مستغربه
حبات الرمل خايفه تلمسك
من شوق غريب يحسدك
لسه فاكر عشق الليالى
وبكى البلابل على الشجر
ولحظه ألم ساكنه جروح
كنا ندوب لو روح لمسها الألم
ويحمر جبينك من الخجل
ليه الحروف خايفه تحضنك ؟
كتبت اسمك فوق موج البحر
وكلمه بحبك عاشقه السفر
ليه المشاعر متغربه ؟
بسافر لعيونك الحلوه
مع نسمه هوا طايره
تاخدنى ليكِ أحس بهواكِ ينتفض
تاخدنى الرعشه وأحضنك
فوق موج البحر ورمال الشط
المستغربه
فى لحظه لقا تتوقف كل العواصف
ويهدى موج البحر
ليه الحروف خايفه تحضنك ؟
لما يكبر حنين الشوق لعيونك
وأشوف الدنيا من لونك
واحلم بحضنك الدافى نار بتكوينى
بعدك على عينى
يا ساكنه عروقى وشرايينى
ليه المشاعر متغربه ؟
بسافر كل يوم ليكِ
ما أنا اللى ساكن ضى عنيكِ
تاخدنى النظره وأعدى
ألاقى موجك بيحدفنى فِ حضن الليل
خايف أكون ليكِ رحيل
ويتعود حبى الحزين على غربتك
يا ترى اليل الحزين ماشى ف سكتى
ولا نبض الحياه عاشق غربتى
ليه الحروف خايفه تحضنك ؟
لما قلت لك بحبك هزيتى الكيان
بكت عيونك ..حسيت بالأمان
سارح جوه روحى
بسألك مليون سؤال ؟
ليه حروفى خايفه تحضنك ؟
ليه المشاعر متغربه ؟
مش لاقى منك جواب
يمكن أكون عاشق
يمكن أكون كداب
عارفه معنى السكات
لما الحنين يبقى رفات
يموت الأمل جوايا
وألاقى نفسى ماشى ف سراب
مكتوب عليه أعشقك
ليه الحروف خايفه تحضنك ؟
ليه المشاعر متغربه ؟
بقلمى/ سيد نيرعطيه
ليست هناك تعليقات:
إرسال تعليق