خلينى أعيش

نفسى أقولك وحشتينى
برمش العين غطينى
جوه قلبك حوطينى
خلينى أقولك وحشتينى
يا أجمل حب عمرى وسنينى
نفسى اقولك حسينى
بلمسه عيونك دفينى
رموشك سكنى وحنينى
نفسى اكتب اهاتى فوق جبينك
يا خدنى الحلم لعيونك
 زى طفل وليد
فقد حنانك وحنينك
عيونك مرسى الحنان
قلبك نبع الامانى
نفسى اقولك وحشتينى
بصوت دموعى ضمينى
مدى الايادى عدينى
خلينى اعيش جوه منك
انا مش عاشق بحبك
انا مخلوق لحضنك
ضمينى يا نسمه هوا
يا ليل جريح فارد ضفايره
فوق كتاف الفجر البعيد
يا لحظه شروق يتمناها الحبيب
خلينى ارسم ضحكتك
فوق شفايف غطاها الليل العنيد
خلى نور الفجر يكبر
جوه حلم الوليد
خلى الامل جناح عاشق لحظه لقا
لسه بسأل الليل العنيد
مهما تبعد خطوتك
نبضك ف قلبى عايش اكيد
مهما تتبدل حروف اسمك
ح يفضل قلبى وطن وليد
خلى الامانى تبعد بعيد
حروف اسمك وطن جديد
يا وطن عايش جوايا
بكتب  حروف الحياه
ترسم طريق الامل
خلى الامل موجود جوه النفوس
لو العقول تاهت وتغيرت الوشوش
ح يفضل حبك منقوش
فوق نسمه هوا طايره
زى لحن بتعزفه حروف
يا وطن تاهت ملامحه جوه حضنى
يا فرح عشق الحزن القريب
يا ليل بينسج اهاته ويا لحظه دفا
ويا حضن انكوى ساعه الغروب
ويا  نسمه هوا تشفى العليل
خلى قلبك وطن
خلى جرحك الم
خلى نبضك حروف تكتب بحبك
ايوه بحبك
ما تستغربيش
ح افضل احبك مهما تتغير وشوش
لو الاحتياج رغبه تحرق نفوس
تدبح عقول
تتعطش ليها العيون
ح افضل ارسم ضحكتك بدمع العيون
خلى العيون تكوى الجفون
دموعى نار بتحرق فراق
فراقك موت اكيد
يلى رسمتى معنى لحياتى
خلينى اكتب بحبك
خلى حروفى تعيش
ترسم ملامح غربتك
مهما تغيرت الوشوش
نفسى اقولك وحشتينى
نفسى يضمك جبينى
خلينى اعيش
يا وطنى وعمرى وسنينى
بقلمى / سيد منيرعطيه