قريب منك

**********
وبعدت غصب عنى
رغم شوقى وحبى
طاوعت نفسى
ارتضيت ظلم الليالى
وهجر غالى خدنى مِنك
كنت عايش مِنك قريب
اترجيتك دموعى 
خليكِ جنبى
خدك العناد
خدك البعاد
نسيتى حضنى
بفتكر لحظه حنان
والشوق اللى كان
مالى كيانك
عايش عشانك
فين الأمان؟
فين ضمه ايديكِ
وشوق عنيكِ
ولمسه ايديكِ
وحلم الزمان
لسه عايش رغم العناد
فارد حضن الليالى
أتمنى لقاكِ
ماتخافيش انا مش بعيد
انا مش غريب
انا حب أكيد
عايش معاكِ
لو الفراق نار تحرق قلوب
انا مش ح توب
مهما تبعد خطوتك
مهما تقسى محبتك
لسه الزمان عايش معايا
فاكر لحظه امان
فاكر صوت الكلام
لسه الشفايف خايفه تبكى
لحظه وداع
حاضنه همسنا
لسه العيون سارقه منى
أجمل كلام
صوت الذكريات
ساكن فؤادى
عايش فى نبضى
فاكر حياتى
كأنك ميلادى
يا شمس غايبه ليه ؟
خايفه تعدى
مهما يطول البعد
قربك حاضنى
لسه فاكر حزن قلبى
وقت اللقا
كنت حاسس فراقك
جوه منى
عايش بلا أمل
حاضن ألم 
مهزوم من الخوف
لحظه فراق
تساوى الحياة
خليكِ بعيده
عنيده
مهما تدور الليالى
مش حتلاقى حضن دافى
ولا نبض كافى
حتلاقينى فى حلمك
جوه حضنك
عايش غصب عنك
ساكن ضلوعك
حاضن خوفك
قريب منك

*************************** 
 بقلمى/سيد منيرعطيه